是咁的，尋晚我10點零鐘到響佐敦搭車，
星期六晚架車好多人，幾乎冇哂位咁滯，淨返車尾半排，
同右手面倒車位計埋六個位到。
有條港女就坐響車尾最右手面個位，佢隔離個位就放左個手袋，
對面個倒頭車位就放左個萬寧袋。我女友諗住坐入去倒頭車位度，
條港女就對我女友講：「唔好意思，我留左個位畀朋友。」
我要入錢，所以行得較慢，入到去我女友已經坐低左另一個位，
後尾架車開左，我女友先同我講：「咦？佢應該有一個FRIEND個喎。」
當時我女友仲以為佢有個FRIEND入緊錢，所以要留位，原來根本唔係。
到下一個站，有對夫婦攬住個BB上車，老公就一袋二袋又呢又路咁，
老婆坐左上去萬寧袋隔離個位，叫老公坐入去咁。
老公見到有個萬寧袋，就問：「個袋會唔會有人架？」
條港女就話：「哦，係呀，我留左個位畀個friend。」
個男人就發現條港女隔離都有一個位，但係就畀佢擺左個手袋，
又問係咪有人咁，條女夠膽死真係話：「哦，係呀，都留左，唔好意思。」
個男人塊面黑左一黑，但唔知咩原因，冇再出聲。
我當時就心諗：「＿，咩friend咁巴閉呀？上車未呀究竟？」
我響佐敦上車，條女就話有friend，卒之去到太子佢d friend終於上車，
原來係一個媽咪加一條7、8歲既靚仔，我見到有靚仔，心諗算鬼數，
費事＿你會影響到個靚仔。
點知，原來條靚仔都係＿＿一名，佢坐左響初初有萬寧袋個位度，
隔離個女人抱住果個bb，有隻腳仔叉左出黎，但都只係過左個位小小，
條靚仔就嘰嘰兀兀，仲大嗌：「E~~佢隻腳呀~~！哎吔~~掂到條褲呀！」
我＿你，個BB鞋都冇著，又乾乾淨淨咁，玩下手你污糟過佢啦。
又坐唔定，有位唔坐，又企起身又訓落個媽咪度，好心教下你個仔啦，
唔坐就讓畀人，知唔知個老豆拎住一袋二袋好鬼辛苦架？
＿＿，鬧都冇鬧，由得個仔亂黎，終於我都我女友忍唔住。
我女友忽然大聲咁同我講：「諗諗下其實都幾新鮮，巴士留位，呵？」
我就話：「係架！一大班FRIEND去旅行，講句後面六十個位我留左畀FRIEND，真係連車
都唔鬼駛租呀！」
條女肯定聽到，佢面容扭曲哂咁樣拎過黎望住我：「咩意思呀？」
我就用張耀揚響古惑仔入面果句：「串你囉，咩意思呀？」
條女聽到即刻發我圍，又話關你鬼事又話八卦又話男人之家單打，
我正想出聲已經有幾把聲小返佢，包括對夫婦，直情指住佢個鼻鬧，
連坐我女友對面果個LV女同南亞裔青年都鬧埋佢一份，嘩一時之間巴士幾熱鬧，個媽咪
加入戰團都無補於事，條靚仔就喊到九彩，
我同女友得閒就加兩句，得閒就小兩句，玩個不亦樂乎。
卒之呢三個＿＿去到長沙灣頂唔順，走左落車，但肯定本身唔係想響長沙灣走，
因為當條靚仔知道要落車時，脫口講左句：「嘩~唔係返屋企咩~？!嘩~~」
佢地落左車我地後排既都仲講緊，尤其對夫婦，講到面紅耳赤，
最犀利係佢地個BB，由頭訓到尾，嘈到拆天都冇醒過。
我地講講下又笑，講講下又笑，好似小學去旅行咁，都幾過癮。
![叮噹小城超級高層[榮譽]](./images/ranks/highest2.gif "叮噹小城超級高層[榮譽]")
![叮噹小城神之使者[超級榮譽]](./images/ranks/god_son_2.gif "叮噹小城神之使者[超級榮譽]")
新主題
網站地圖
RSS Feed