[FW] 童年必玩無聊遊戲(大家快玩XD)

**#1樓**, 由 **AK47** » 2006-04-26, 週三 12:10 AM , 繁簡轉換:

1. 震音與風：簡直爆大冷！原來好多人都試過對住風扇，把聲好似「聲音經過處理」咁，重可以校唔同 Level ，震音程度，有埋秀髮飄揚效果，真係開拍 MV 咁，若個風扇曉「轉」，重可以扮 Fade Out ！

2. 插米：抱住「常滿」紅A膠米桶練習「天津炒米」或者「鐵沙掌」。往往隨時遇上阿媽藤條踢館，走火入魔武功盡失！

3. 飛拖鞋：拜足球小將所賜，飛拖鞋鬥遠是為屋村細路必玩項目。先燕式平衡再發力踢，沉醉「猛虎射球」世界。

4. 商場暴走：全力助跑4、5米然後先跣得2、3米，其實過行路搵你笨。所以根據進化論，演變出今日暴走鞋。

5. 電梯倒行：超級危險遊戲，一下失手隨時浴血電梯上頭條。官恩娜阿哥係最好人辦。

6. 踩影：唔知邊度聽到人話俾人踩中個影會黑仔衰三日。12 點烈日當空最好玩。

7. 踩人白飯魚：白飯魚，係踩，你髹得愈白洗得愈乾淨就愈易成為眾人目標！

8. 飛墮鹹書：後樓梯偷睇鹹書，睇完重要撕出丟落街。儲定千五蚊俾人罰啦！
　
9. 背脊貼龜：貼時記得要用張長膠紙，輕輕High 過目標背脊。大力拍只會打草驚蛇。

10. 撩鼻屎黐落牆：好唔想畀佢上榜，實在太核突喇。奈何大部份受訪者都陰笑自己有玩過。哎，家陣傳染病猖狂呀！　

11. 壁虎功：屋企走廊或房門練習，落番手騰腳震。

12. 飄移購物車：超市必玩，但如果唔買番咁上下貨架車度，小心翻車。

13. 鋪紙刮大銀：課本、練習簿角落頭總有一兩個，原來大家早就領悟「錢滾錢」道理。

14. 捐地鐵出入閘機：明知過三歲，仍然不買票，好多人都做過，但睇怕都係「被迫」。　

15. 跳梯級：跳得愈多愈好，愈型，街訪發現原來最少要跳到8級至叫合格，厲害者一跳10 級，勁過玩X-Game 。　

16. 玩水喉：洗手時突然住個水喉搵水射人。

17. 濕紙巾黐天花：將紙巾整濕撕碎丟上天花板，等佢黐住個天花或者跌落掟中死對頭。

18. 彈擦膠：用間尺扮搖搖板，彈起擦膠。

19. 踩階磚：地下有階磚時，特登隔一格一格行。

20. 白粉工場：用間尺切擦膠碎，扮「白粉工場」。

21. 射橡筋：幾條橡筋一齊射，睇落好似好勁，實質瞄唔準。

22. 夕陽石壆：樓梯邊石壆玩溜滑梯。但家斜石壆難搵，雷同跣鐵欄都係沒落遊戲。

23. 白鴿轉：捉地鐵扶手轉呀轉。

24. 燕式平衡：行路邊凸起石壆或者花槽。

25. 裝假狗：食完瑞士糖將粒糖紙重新包好請人食。

26. 自閉搣牆：搣牆上牆紙或者乳膠漆，阿媽發現必死無疑。

27. 阿茂整餅：用間尺同百寶貼整Pizza 。

28. 龜兔賽：地鐵月台鬥快跑。

29. 秋高放膠袋：膠袋當風箏放。

30. 白撞：亂人門鐘後速逃。

31. 咪過電：塞寶貼落插蘇。

32. 霹霹啪啪：商場搭電梯時拍拍塊防撞玻璃板。

33. 圍閹：嘩！小心絕後。

34. 曬：利用手表面反射陽光。

35. 搶爛巿：將汽水罐放車轆前，等人開車時車扁佢。唔通想同執罐阿婆搶食？

36. 精神分裂：屋企一人分飾幾角玩煮飯仔。

37. 吹口水波：經歷沙士，相信受歡迎程度無復當年！

38. 畀人：重新包回綠箭香口膠的包裝紙，塞番入去請人。

39. 俄羅斯粉刷：玩俄羅斯輪盤，將沾滿粉的粉刷放吊扇上，一開掣睇粉刷飛出掟中邊個。

40. 丟拖鞋：將人家的門口拖鞋丟落街。

41. 水彈：最常載有尿同墨水。

42. 射水槍：用水槍射街上途人。

43. 空中飛人：坐鞦韆Fing 到最高時跳出去，鬥遠。

44. 犯校規：偷偷帶玩具返學。

45. 搞破壞：圖釘弄穿學校壁報。

46. 索：將舊式改錯水附送的天拿水搽上手，涼冰冰。

47. 紙蜻蜓：在公屋天井中放紙飛機或紙蜻蜓，鬥慢飛到落地。

48. 放飛機：將紙碎或紙飛機撒落街。

-------------------------------------------------------------------------------------

轉自音符谷.